• الرئيسية
• وجهات نظر

فقيد قلبي

من أصعب الحاجات اللي ممكن أكتبها في حياتي إني أقول:
كان نفسي يكون هنا.

كان نفسي أصحى النهارده وأفتكر إن ده يوم ميلاده، وأفكر هجيب له إيه، وأقول له إيه، وأفرحه إزاي...

لكن الحقيقة الوحيدة اللي قدامي دلوقتي إن والدي رحل.

ومن يوم ما رحل وأنا حاسة إن الدنيا مش هي الدنيا.

في حاجة جوايا اتكسرت يوم وفاته، ولحد النهارده مش عارفة أصلحها.

أنا مش بس وحشني...
أنا وحشني وجوده في حياتي.

وحشني إحساس إن ليا اب موجود، أقدر أشوفه، وأسمع صوته، وأروح له، وأحكيله، وأطمن لمجرد إنه موجود.

في ناس بتقول إن الإنسان بيتعود على الفراق...

أنا ما اتعودتش.

كل اللي حصل إني اتعلمت أعيش وأنا موجوعة.

اتعلمت أضحك وأنا جوايا حزن.
اتعلمت أتكلم عن كل حاجة، وأسكت عن أكتر حاجة بتوجعني.

والنهارده بالذات، وجعه مختلف...

لأن ده يوم ميلاد الإنسان اللي نفسي أقول له:
كل سنة وأنت طيب...

بس مفيش غير صورة في إيدي، وذكريات في قلبي، ودعوة أقدر أبعتهاله.

بابا...

أنا مش عارفة إذا كانت الكلمات ممكن توصلك، لكن نفسي تعرف إني لسه بفتكرك كل يوم، ولسه غيابك واجعني، ولسه جوايا كلام كتير كنت أتمنى أقولهولك.

يا رب تكون حاسس بحبي ليك حتى وإنت بعيد عن عيني.

يا رب تكون في مكان أحن وأجمل من الدنيا كلها.

اللهم في يوم ميلاد بابا، ارحمه رحمة لا تنتهي، واغفر له، وأنر قبره، وأسعده في جنته، واجمعني به يومًا لا يكون بعده فراق.

كل سنة وأنت في قلبي يا حبيبي...

وحشتني...
وغيابك لسه بيكسرني.